الاثنين، أوت 20، 2007

أنا مع كارفور و جيان و ضد العطار و الخضار و الجزار التقليدي




اليوم قريت في جريدة تونسية عن الهمجية الى صارت الأيام الإخرة في الصولد متاع كارفور و جيان. الصحفي ختم المقال بأنو التونسي "الحقاني" ما يعملش حاجات كيما هذه... ظاهرلي اللي شفتهم في التصاور يحملو الجنسية التونسية و مش جنسية أخرة. الهمجية هذه تراها كل يوم في وسائل النقل و في الإدارات و في النزل و يكذب إلى يقول راهم مش توانسة.


لحقيقة كيف مشيت لكارفور تونس عام 2000 أول مرة، أحسن شي عجبني هو جناح الخضرة و الغلة . تختار و توزن كيما تحب. و عجبني اللحم إلى في باكوات موزون، مفروز و نظيف... تقولو هذه حاجة بسيطة ؟ بالنسبة لي حاجة كبيرة علا خاطر ياما كليت من غشان الخضارة و العطارة متاع تونس العاصمة و ما يحس الجمرة كان إلى يعفس علاها.


المصيبة الناس قدام الغش و السرقة حتى حد ما يتكلم و الناس إستانست بالهم و ساكته. إلي شفتو في أحياء كيما إبن خلدون و حي الخضراء و الحي الأولمبي من هالأوباش شيى يعري الراس. تشري و تسكر فومك خامج و إمسخ و حتى حد مايتكلم . المشكلة في مسالك التوزيع إلى يحكمو فيها ناس واصلة مايحبوش يفرزوا الخضرة و يجي من بعدهم الخضار و الجزار الغشاش قليل التربية.


هنا في باريس الجزار ولا الخضار إلي يغش ولا يكون قليل التربية ماينجمش يعيش أكثر من 24 ساعة. واحد براني كي يجي يشوف كيفاش البائع التونسي يتعامل مع الحريف متاعه يقعد باهت كيفاش ميزالوا الناس يشريو من عندوه. و عندي ذكريات مع عطار في الحي الأولمبي ديما معنطز علي حرفائه و خضار يخلي حرفائه الواصلين يختارو و اللخرين ناقص كان بش يضربهم.


مرة حبيت نشري لحم في رمضان في الحي الأولمبي (على خاطر عمري مانشري لحم من تونس العاصمة). مشيت للجزار الوحيد في الحي إلي معنطز على العباد و ما غير ما نجرب نعرف راهوا بش يغشني دخلت و شفت جيقو علوش معلق، قتلوا أوزن هولي الكل، إتبسم شوية على خاطر فهم راني غلبتو و أني نحضر في الفلوس زادني قطعة بالسرقة بش يزيد في الميزان.

كيف حكيتها لأستاذ متاعي يسكن في نفس الحي، قال يعطك الصحة كيفاش فقت بيها هو أنا أكبر منك و مافقت بالحيلة كان العام إلى فات. الجزار ماتغلبو كان بالكثرة. يعني تشري قطعة كبيرة بكثرة الغش إلي شافوا من هالجزار,

أما أنا نقول الجزارة و الخضارة و العطارة التوانسة ما يغلبهم و يعلمهم التربية كان كارفور و جيان.


من غشنا فليس منا

هناك تعليق واحد:

غير معرف يقول...

ألف شكر لك عزيزي
-------------------------
مدونة القاضي العربي Fabulass
http://fabulassworld.blogspot.com
-------------------------
دليل الصحف الخليجية
http://arabiangulfnewspapers.blogspot.com