الأربعاء، ماي 16، 2007

تونس يا بلادي


بلادي كيما البلدان الكلّ
فيها الباهي و فيها الخايب
جماعة يقولوا الباهي أكثر
وجماعة يقولوا الخايب أكثر
و ممكن اللّي اليوم يقولوا هكّا
من غدوا يقولوا موش هكّا
هاذى هيّ بلادي اللّي تقصّت فيها صرّتي
هاذى هيّ بلادي وبلاد أجدادي
اللّي علي شبر من ترابها نفديها بعمري و عمر أولادي

بلادي فيها اللّي يزمّر عليك في الضّوء الأحمر
يحبّك تحرق ولاّ يتغشّش عليك ويسبّلك والديك
و فيها اللّي كتصبّح عليه يقعد درج وهو يرحّم علي والديك
فيها الفقير يقلّك لاباس عليّا
و فيها الغني اللّي يقلّك ما عنديش و ما نعطيش
فيها الفقير يقتل روح على دبّوزة
و فيها الغني اللّي ما يعمل كان الخير
فيها الفقير اللّي عايش فرحان
والغنيّ اللّي ما يرقدش اللّيل
فيها اللّي يفيّس بال 404 باشي
واللّي يفيّس بال 4*4 كاشتي
فيها الزّوّالي اللّي يقصّولوا الطّاكس من الشّهريّة
وفيها رجل الأعمال اللّي الدّولة ما تعرفش لون فلوسو
فيها اللّي يحبّ المثّاومة، الملخّيّة والكمّونيّة
و فيها اللّي يحبّ البيزا ، البورقر و المقروض لكن بلا ليّة

فيها اللّي يصلّي يقولولوا خوانجي
واللّي يسكر و يغنّي يقولوا هامل
فيها البنيّة اللّي تلبس الحجاب ما تعجبش
واللّي تعرّي روحها كيما لقورّا ما تعرّسش
فيها النّاس النّهار الكلّ تقيّد في أحوال النّاس
فيها ناس ما عندها ما تعمل كان تحكم علي النّاس
فيها البطّالة ما تعمل في شيّ
واللّي يخدم زاده، ما يعمل في شي
فيها البطّال يلوم فلّي يخدموا
واللّي يخدموا يلوموا عالبطّالة
و الكلّنا نلوموا في بعضنا ما عاجبنا شيّ
و خالتي عطيّة اللّي فيك ردّو فيّا

فيها عقليّة فريدة من نوعها
عقليّتي و عقليّتك و عقليّتنا
كي تجمعهم مع بعضهم يعملوا فسيفساء مميّز
و هذاكا علاش أحنا نحبّوا هالبلاد
ونزيدو نحبّوها أكثر لو كان كلّ واحد
يغزر لروحو قبل ما يغزر للأخرين
و يحكم علي روحو قبل ما يحكم علي الأخرين
ويتلهي يحسّن روحو قبل ما يتلهي بلأخرين
وأنا أوّل واحد فيكم :)

هيّا بخاطركم ، و تصبحوا علي خير وعافية

هناك تعليق واحد:

غير معرف يقول...

يا ريت فمّ برشة من هذا الكلام هذا ترتيش اما الصحيح تو قريب يجي إن شا الله