الأحد، أكتوبر 15، 2006

بنت خالي والمنثورعدد 108

بنت خالي من صغرتها مهتما برشا بالدنيا و اللي داير بيها .. ملي نطقت و هيا نهار و طولو تسإل و تبتبت .. ساعات تسإل سؤالات تعجز.. تخلي خالي الله يرحمو باهت .. و في اغلب الاحيان حاشم .. على خاطر كان باش يجاوبها يولي تطيح قدر .. عاد يبعثهالي .. بره لمريم توا تقولك .. وانا نفسر .. القطوس آش يعمل فوق القطوسة .. وعلاش امها تعيط لمماتي امي .. و لامها نانا .. وآنا نجبد من هاك اللاوي و نألف وحدي و نلصق .. و نحكيلها حكاية على قد مخها ..
ستانست .. وين توحل و ما تلقاش خالي .. تمشي لمريم .. حتى كيف توفى خالي .. و رغم اللي خلاها كبيرة يرحمو .. باقي السؤلات المحرجة ما يرسيو كان في راس مريم ..
هذاكا علاش طلبتني ليوم ..
قتلي مريم عندي سؤال .. شميتها قارصة آنا .. وفهمت اللي باش ترصيلي نخدم في مخي على الصباح .. و ما نيش ناقصة تجوجيم .. امّا شنعمللها بربّي ريحة خالي .. وخالي عمرو ما قصّر معايا ..
قلتلها اسئل عزيْزا .. قتلي بربّي شنوّه المنشور عدد 108.. آنا سمعت كلمة منشور وآنا ركايبي ولّات ترعش .. عندي حسّاسية مل الكلمة هاذي ملي كنّا نسكنو بحذا عليسة .. وكنت ناخو ال 38 مع جماعة الفاك د دروا ..ايامات حرب العراق لولا .. حسيلو حكايتي حكاية مع كلمة منشور .. قلتلها يا بنت شيقول فمي .. انتي آش موصلك للحكايات هاذم !! معييناش ما وصيناك !! هذي تربية خالي ؟ بالكشي تسخايل روحك مسيبة .. وما عندكشي شكون يحكم فيك .. ملّا منطق .. مناشير و لغة !! متاع هذا احنا ؟
مزلت كي باش نزيد نشعل .. بدات تبكيلي .. ولا و والله خاطيني .. وتعرفني مش متاع هذا .. اما راهم ما خلاونيش ندخل نقرا ليوم .. قالولي ما تدخل لمّا تقرا مليح مليح الطّبّالة هاذا اللّي قتلك عليه .. وتطبقو بلحرف
..
قعدت نخمّم شويّا .. برّا برّا .. فهمت الدّاقزة .. قلتلها اسمع بنيّة خالي .. هاذاكا بروسبكتيس تابع الجمعيّة التّونسيّة للمحافظة على التّراث .. قلّك يلزمك تلبس لبسة بلادك و تنحّي هاكلّلي جاي من برّا .. الميني خاطينا ! لازمك فوطة .. والدجين خاطينا ! لازم دنقري .. وهلمّذا ..
شوف كيفاش بنيّة خالي .. تعدّالي لدّار .. توّا نعتيك سفساري حرير متاع ممّاتك .. كان قالولك لا .. ارجعلي .. نعتيك سنجق .. متاع حماتي لولى .. هاو صلح .. كان قالولك شنوّه هاذا قلهم على بواب عرس و محجوبة على الشمس .. كان قالولك لا .. توّا نهبطو لكرّيات لكساوي في باب سويقة .. نشوفو نلقاوش طاقٌيّة .. ولاّ حتّى فوال عروسة .. كان زادا قالولك لا .. الله غالب عليّا و عليك .. تولّلي تقعد فالدّار ..تصلّلي صلاتك بالحاضر .. تتفرج على التلفزة .. إقرأ .. المنار .. الجزيرة وما شابهه .. باش تزيد تتفقها اكثر ماك متفقهيا .. و باش تزيد تتسكر .. اكثر ماك مسكرة .. وباش تفسّرلي مليح مليح كيف نجي بحذاك .. السّيدة المنّوبيّة .. آش تكون من ربّي ..

هناك تعليق واحد:

nabil يقول...

tahfouna lihkaya