السلام والإحترام للسادة والسيّدات قرّاء المدوّنة الكرام، أمّا بعد هذه التحيّة، واللغة المضروبة الخشبيّة، ننتقلو بيكم إلى صلب الموضوع، وإلى هذا الخبر اللّي لا فهمناه لا مخلوق ولا مصنوع. قالّك يا سيدي بعد ما كلينا العلّوش، البلاد قام فيها الكرتوش. إي نعم كرتوش موش فوشيك والحكاية جدّ وماهيش تفدليك، في قلب الضاحية الجنوبية، من حمام الأنف لبرج السدرية ، ومن سليمان للجبال والوديان، عشنا وشفنا يا الأولاد الكرتوش يخيّط في البلاد!
ماعدى البلاغ الرسمي، اللّي ما عطى كان الرسمي في الرسمي، واللّه أعلم كانو يحكي بالرسمي، الصحافة عملت روحها مقيّلة ولاّ موش لاهية، وجماعة الإشاعات كي العادة خدمو خدمة باهية، قالّك يا سيدي الهمهاما ولاّت الكوسوفو، وناس تقول عصابة وناس إرهاب وناس كوموندو ، و النبّارة نساو حكايات صدّام والكورة، وما عاد الحديث كان على جبل بوقرنين و جماعة تورا بورا. ماكم تعرفو في بلادنا حتّى شيء ما يتخبّى، أما زادة في أغلب الوقت الحبّة تولّي قبّة، والأخبار في إذاعة "قالو" توصل شطرها من وحي الخيال ، وربعها من مصادر غير موثوقة، ويزيد كلّ بطّال في كلّ قهوة يشمّر على ذراعو، ويعطي المساهمة الشخصية متاعو، يعني في النهاية صعيب باش تفرز الصحيح من البلّوط، وتولّي الحكاية خرافة كيما خرافة بوشلّوط.
حاسيلو آش باش نقوللكم يا مرحومي الوالدين؟ أنا زادة عندي مصادر متاع معلومات كيفي كيف الناس الكلّ ويمكن أحسن شويّة على اللّي صار، أما ما إنّجّم نقول لي وليكم كان أستر يا ستّار. توّة نحنا بلاد توريستيك و معروفة في العالم أنّها ديما سيمباتيك، وكيما تعرفو في الدنيا هاذي اللّي يسمّيك يغنيك واللّي يحكي بيك كلام كيما هذا يقضي عليك وينحّيلك جدّ والديك. عادة إنتي يا خويا لواش عليك تجيب البلاء لينا وليك وتقطع في رزق أمّاليك؟ حتى كي تشوفو الكرتوش بعينيك، إبتسم وقول "إنّه فوشيك، ولعب وتفدليك"، وأشطح ربّي معاك هاو جاك الجينيريك!
ليست هناك تعليقات:
إرسال تعليق