الخطوة الأولى أحسن من مليون خطاب

الحرب العالمية الثانية قتلت 50 مليون بشر

أوروبا بعد 50 سنة توحّدت ونسات الحرب والأحقاد القديمة بين الدول الأعداء

و نحنا في المغرب العربي عندنا 50 مليون سنة ونحنا وخيّان وأحباب

عندنا 50 ألف سنة من التاريخ والحضارة والثقافة المشتركة

عندنا 50 مليار سبب باش نكونو متوحدين

واليوم، وبعد حوالي 50 سنة من الإستقلال لبلداننا الشقيقة والصديقة

ما عندناش شبكة قطارات مشتركة

ما عندناش طريق سيارة مشتركة

ما عندناش سياسة طاقة مشتركة

ما عندناش حتى مسابقة متاع عدو ريفي مشتركة

علاه؟ بالله فهمونا علاه؟

في الوقت اللي البلدان في العالم قاعدة تتخلّى على المفاهيم البالية متاع السيادة الوطنية المتعصبة وتخدم مع بعضها في إطار جهوي وإقليمي وقاري، نحنا في بلدان المغرب العربي مازلنا نحبو نفـتـفـتو الفتات ونشتـتو الشتات ونتعاركو على الصحراء الغربية، زعمة تابعة للمغرب وإلاّ للجزائر، زعمة نعملولها حكم ذاتي وإلاّ إستفتاء على الإستقلال؟

بالله موش عيب؟ تي هي صحراء يا رسول الله، أعطيوها حتى للجمال تسرح فيها، توة هاذي حكاية؟ تاقف الدنيا على طرف صحراء؟

موش لازم الإنسان يكون إختصاصي في علوم الإقتصاد باش يفهم قدّاش الإتحاد المغاربي هو فائدة كبيرة من الناحية الإقتصادية وينجم يعاون بصفة كبيرة في التقليص من الميزيريا السائدة والبطالة في بلداننا. حسب دراسة قام بها البنك الدولي في تونس والجزائر والمغرب، عدم التوحّد في إطار المغرب العربي قاعد يحرم في الدول المذكورة من ما بين 1 و2 بالمئة من النمو سنويّا، يعني في عوض نسبة 5 بالمئة اللي نعملو فيها في تونس تولّي 6 إذا كان موش سبعة بالمئة، وهالخسارة هاذي ، باش نسهلوها للناس الكل، تساوي حوالي عشرة آلاف موطن شغل قار سنويّا. ظاهرلي ماناش مستغنين عليهم...

المغرب العربي الموحد إقتصاديا على الأقل هو أكثر من ضرورة في الوقت الحاضر، وكيما أوروبا المتحدة بدات بعد الحرب العالمية الثانية بوحدة مابين فرنسا وألمانيا في ميدان ضيق هو الإتفاق على تكوين سلطة عليا لتنظيم قطاعات الحديد والفحم، المغرب العربي لازمو يبدا من مشاريع عملية من النوع هذا، النقل، الطاقة، الفلاحة، الكورة، الحشيش.. يا خويا شوفو منين تبداو، أما أبداو يرحم والديكم

هذا ما يجعلني نفكّر في حاجة يمكن تكون باهية برشة لو كان تلقى إقبال منكم إنتوما المدونين والقراء، علاش ما نقوموش بحملة في المدونات التونسية ندعو فيها إخواننا في المغرب العربي باش ينظمولنا في حملة تدوينية للمطالبة بخطوات جدية وعملية لتحقيق الإتحاد الفعلي ما بين دول المغرب العربي وتجاوز الخلافات السخيفة والعقد النفسية اللي واقفة في طريق المغرب العربي، على الأقل خلّي الناس اللي عندها سلطة القرار تعرف أن المسألة هاذي عليها إجماع شعبي في مختلف دول المنطقة، ولعلها الخطوة الأولى تكون من عند المدونين المغاربة مادامت السياسة فشلت لحد الآن في تجاوز مرحلة الخطابات والكلام الجميل

هذا مجرد إقتراح نتمنى أنو يلقى تجاوب من عند المدونين والمدونات التوانسة، يمكن التفكير في تحديد يوم من أجل المغرب العربي، كيما عملنا يوم التدوينة البيضاء وكان ناجح نسبيا. يمكن زادة وضع شعار للحملة نحطوه في مدوناتنا، حاسيلو الأمور هاذي نتفاهمو فيها كان تحبو من بعد.

أنا في إنتظار تجاوبكم مع المقترح، خاصة المدونين والمدونات اللي عندهم علاقات مع مدونين معروفين في الجزائر، المغرب، موريطانيا، وحتى ليبيا باش ينشرولنا الدعوة للوخيان في البلدان المغاربية.

هاذي مجرد فكرة جاتني وأنا نكتب في البوست هذا، ما نعرفش عاد آشنوة باش يكون رأيكم، وبارك الله فيكم على كل حال