ان كنت تونسيا فهذه مدونتك... و ان لم تكن تونسيا فهذه مدونتك.....
نافذة العرب على عالم المدونين التونسيين...
هذه مساحة للنقاش الحر و تبادل الاراء بلغة الضاد. نريدها ان تعبر عن مشاغل أبناء حنبعل و عليسة، آرائهم، طموحاتهم، و مواقفهم ، مرآة تونس الخضراء ولسان حاله
تعرف؟ ماناش لاباس علينا, منين تغزرلها تلقاها مسكرة, الاقتصاد بارك على ركايبو و ماعادش تقوملو قيامة, الناس في بعضها ماهاش صافية حتى بين الخو و خوه والولد و بوه.
كان التكمبيص والتكمبين و تخديم المخ و ما تسمع كان هاذا لعبها إل هاذا و لاخر يحفر للآخر و هاذاكا مسكين كعبروهالو على خاترو نية و قدو قد روحو.
هاذاكا موصي عليه سي فلان و لاخر ولد أخت مولى الباش متع عرس سي فلتان.
والله ماني عارف شنية آخرتها الي نسمع بيه هاو مقطع هاذا عمل دوسي إميغراسيون لالكندا و لاخر دبر كنتراتو في فرانسا و لاخر مشا لدبي و لخرة عرست بأنقليزي و هجت مابلاد.
كل يوم تسمع إب بابور حراقة مشا للبانتليرية وإلا لللامبيدوزة,
نحب نعرف والله
الزح نتذكر قبل كانو الناس يجيو لتونس باش يخدمو , كانو المغاربة يجيو يخدمو فالمرمه والعسة والخدم الصعيبة توا تقلبت المشامية ولاو التوانسة هوما الي يمشيو لالمغرب.
يلخي ويينو عزك و دلالك يا تونس؟
قبل كنا نسمعو بهاذا رجع روتور ديفينيتيف و لاخر جا مالأوروب و عمل مشروع أما توة ما تسمع كان أهوكا جاب “ف س ر” البيع و راجع أش مروح بيه لالدز بعد ما كان فالعز.
ما نعرفش كيفاش الامور عندكم في بلادكم, اما في بلادنا, نورمالاند, كل أنسان عندوا حرية تامة في ما يخص شنوة يلبس و الاّ في شنوّة يعتقد بالطبع اذا هالمواطن الحر ما تعداش على مواطن غيره بأي صفة يعاقب عليها القانون النورمالاندي.
بالفلاقي, كانك داهن شعرك بالأخضر و عامل 500 بلّوطة في بدنك و الا كانك مربي لحية كيف تمشي تعثر فيها و الا كانك تعتقد انه رونالدينوا هو المهدي المنتظر … هذاكا يخصك انتيو ما يخص حتى حد غيرك مادامك مستكفي برويحتكوما أجرمت في حق حتى حد.
انا سخشيا, و اعوذ بالله من كلمة سخشيا, نحترم كل فتاة اختارت باش تلبس الحجاب مادام هي مقتنعة بيه في اطار النورموقراطية .
لكن الي ما نحملوش انا يتعدى كل ماهو لباس و معتقد … لانه ورى برشة حجابات, و رى برشة جيب ميني, و رى برشة لحي و ورى برشة مراول تشيقيفارة و ورى برشة سراول باليّة تلقى تسطيكة بقري !
و الادهى و الامر وقت الي جماعة مسطكة موش فاهمة مالدنية شي يحاولوا باش يمانيبوليوك بطريقة بهييييمة ياسر.
كيفاش تراه ؟ حلوا وذانكم و اسمعوا هالحكاية من عند عمكم القوفرنور :
في نهار من النهارات كنت قاعد في قاعة شاي (هي قهوة كيف القهاوي الكل اما الكاس تاي بدينارين موش ب300) … عاملين كيف القهاوي الكل تلافز كبار هذوكم الي يعديو فيهم الكليبات بو دورو. ما بين فخض هيفاء وهبي و بزازل أليسا و الدرياار متاع نجلاء التونسية (ديزولي …ثقافتي محدودة في مجال الكلب العربي..هذوك الاسامي الي نعرفهم.) جاء هالكليب الي عامل روحوا يشجع في البنتّة باش يتحجبوا.
شفتوا ملاّ مستوى وصلولوا العرب ؟
انا –يا جماعة- هالكليب انجّم نكتب عليه دوكتورا كاملة لمدى تمييعوا للأسلام و المسلمين و لسوء النية الي يتضمّنها لا لشيء الا للأشهار لطريقة تفكير سلفية تنفي و تحرّم الكليبات و الغناء من جهة و تدعم ماديا كليبات هابطة و مائعة من جهة أخرى.
1- السيد فرحان على خاطر صاحبتوا تحجبت و كأنه ما كانش يحبها و ولىّ يحبها كان وقت الي تحجبت و في اخر الكليب عرّس بيها يعني : كانك مصوحبة و تحبي تعرسي …عليك بالحجاب
2- السيد فرحان على خاطر بنية عمرها 6 و الا 7 سنين تحجبت … امر غير مفروض بتاتا , و موجود بكثرة عند السلفية. و زيد – من دون زميلاتها الكل- يجازيها هي بطبلية شكلاطة. بينما الاسلام الحق ينادي بالمساوات و العدل. في اخر الكليب نلقاوا زميلاتها تحجبن : تحجبي ندعموك ماليا , تحجبي بمقابل الاغراءات المادية.
3- بنية تتفرج على الكليبات … هالكليبات عاملين عليهم ماسك. بمعنى : الفرجة على الكليبات لا تجوز …لماذا اذن عامليبن هالكليب اذا الكليبات حرام؟
4- بنية صغيرة عمرها 6 سنين تقحر لأختهاالي عمرها في ال26 و كأني بها تتهمها بالفجور ! اين براءة الطفولة في عيني الفتاة ؟ اين السماحة و الاخلاق الاسلامية النبيلةفي ذلك ؟ اين احترام الصغير للكبير ؟
5- بنية صغيرة تفك التيليكوماند من أختها و تنحي الصوت. بمعنى : الغناء حرام …علاش عاملين غناية تقول الي الغناء حرام ؟؟؟
6- البنية الصغيرة تمشي تصلي و بطريقة سلفية. توضيح : حسب الشريعة الاسلامية اذا لم تسدل يداك (كما يفعل المالكية و غيرهم وهو آخر فعل الرسول صلى الله عليه وسلّم) و أردت القبض فيجب وضع اليد اليمنى فوق اليسرى و ذلك فوق موضع الصرّة و موش كيف ما عاملة البنية و برشة سلفيين..فوق الصدر)
7- الفتات الشابة تضع الحجاب بعد رأيتها لمجلاّت موضة. بمعنى : الحجاب موضة … ما تكونيش ديمودي …
8- البنية تقابل صاحبها و هي متحجبة … يمسها من بعيد لبعيد … ينحيلها … خيط من حجابها و يعمل بيه خاتم و يلبسهولها. بمعنى : تحجبي و من بعد الامور تسهال …شيخي امورك معى صاحبك … كان لزم بزواج عرفي (خاتم امبروفيزي).
ربنا يهديكم انتوما يا الي تميعوا في دينكم و يالي الجهل كلالكم قلوبكم.
على مرا عربية ... حرة وبنت اصل .... حاولوا في مرة جماعة فرنسيس والمان يغتصبوها .. وكي كانت اشد منهم وتغلبت عليهم .. سماوها ...جمهورية جابت ثلاثة اولاد .... ولد سماتو ... سيف وزوز بنات .... عدالة ....و.بحرية وبما انو ها المرا ذكية وحكيمة ما فضلت حد من اولادها على الاخر وخلتلهم المجال باش يصرفوا امرهم بانفسهم لكن كي عادة الاولاد الكل في الشرق طغى الولد على اخواتو وصار يتحكم فيهم عدالة كانت بنية ياسر حشامة وما تتكلمش على روحها وكانت مطيعة وشديدة الولاء لولي امرها ... اما بحرية فكانت بطبيعتها مولودة معاقة مسكينة ما عندها قدرة على فعل حتى شيء وكان سي سيف متسلط عليهم مرة باسم الاخوة وكانو هو المسؤول على اخواتو ومرة باسم القيم الاسلامية اللي اعطات للذكر مثل حظ الانثيين .. و بما انها المرا ما يلزمهاش تعلي سوطها .. ولا تخرج من الدار ... وتحتشم في سلوكها قدام الراجل عاد ..طغى سي سيف وتجبر على اخواتو وبدا يعامل فيهم بقسوة ...ودونية وزيد ...بوه عجبو هالوليد الدلول والبو .. كبر وشاخ .. وما عادش في حالو باش يردو وكيما كان البو متجبر جا ..ولدو.... اكثر واشد فقام اختار لاخواتو عرسان من غير ما يشوفوهم خاطر موش في سبرهم المرا تتكشف على الراجل كان ليلة الدخلة .. تزوجت البنية عدالة من قاضي اعطاتو العصمة وتزوجت بحرية من حارس الخليفة زاد على مرضها مرض .... وهذا زاد من هم هاك الاميمة اللي بدت تكبر ...وتشيخ وتجاوزت العقد الخامس ... هاك البنيات فرخو وجت غلتهم .... كائنات مشوهة شوية عندهم انيميا الحرية وشوية مصابين بتضخم عقدة الخوف angoisse كيما يسميوه متاعين البسيكولوجيا وشوية مغرورين بحب الكراسي " ديما-كراسي " demo-cratie واخرين برشة عندهم مرض الكره لكل شيء – حتى لديارهم وهذا مرض جديد ما نجموشي يشخصوه الطبة جماعة اخرينة عاملين كقنديل باب منارة – رجل لداخل ورجل لبرة اخرين انصرفوا عن الدنيا وزهدوا في الماكلة والشرب وطولوا اللحي وماعادشي مسيبين الجامع اخرين مازوشيين يقتلوا في ارواحهم بالادمان ديما شرب وتدخين وخارجين من عفو ربي .... زعمة الحكاية هاذية تطووول ...؟؟ ما يجيش نهار زعمة ها الوليدات يحطو ايديهم في ايدين بعضهم ويمشيو لخوهم الكبير سيف ويقولولو هيا نتفاهمو يا اخي
يستمر حجب "المدونة التونسية"منذ مطلع السنة الجديدة على خلفية الحملة التي قامت بها المدونات التونسية يوم 25 ديسمبر 2006 تحت شعار يوم التدوينة البيضاء وهي الحملة التي تزامنت مع القمة العالمية لمجتمع المعلومات التي انعقدت بتونس والتي كان من ابرز شعاراتها ردم الهوة البين الشمال والجنوب.ان هذا الاستمرار للحجب لايمتلك اي مشروعية وليس له ما يبرره اليوم خاصة للاسباب التالية : اولا:لان هذه المدونة لاتفعل سوى تجميع مقالات المدونات التونسية الاكثر قراءة لذلك فمن غير المعقول ان تعاقب بالحجب في الوقت الذي تنشر فيه المقالات في مدوناتهاالاصلية ثانيا :اذاكان الحجب لسبب "حملة التدوينةالبيضاء" فاننا نستغرب في الانتقاء الذي قامت به الوكالة الوطنية للانترنات لمدونات بعينها(منها مدونة مواطن تونسي وايضا مدونة صديقنا ادم وفلسفة وسامي 111) دون اخرى شاركت مشاركة فعالة في هذه الحملة ومع ذلك لم يتم حجبها . ثالثا :نعتبر الان ان سبب الحجب قد انتهى بتقادم الزمن فلا مبرر لاستمراره. رابعا :اذا كانت تونس قد صنفت في المرتبة الأولى في المغرب العربي وفي إفريقيا والمرتبة 35 على المستوى العالمي في ميدان تكنولوجيات المعلومات.. (Networked Readiness)بعد القمة المذكورة فهذا ما يعزز اليوم مناخ الثقة والانفتاح. خامسا :عملا بتوصيات وقرارات رئيس الدولة في اليوم العالمي لحرية الصحافة الذي ينص من بين ما ينص على الاعتزاز:"بما حققناه من توسيع لفضاءات التعبير وتنويعها وبما وفرناه من ضمانات وحوافز للصحفيين حتى يثروا المشهد الاعلامي الوطني في كنف الحرية والشعور بالمسؤولية والالتزام باخلاقيات المهنة لا سيما وان حق التعبير في تونس اليوم مكفول للجميع".والاجراءات المتعلقة بحرية الصحافة والتعبير وما تضمنته قوانين 1988 و1993 و2001 و2005 بخصوص تنقيح مجلة الصحافة في اتجاه تعزيز حرية الرأى والتعبير. وحث الصحفيين على تجنب الرقابة الذاتية والالتزام بقواعد واخلاقيات العمل الصحفي والمثابرة من أجل الارتقاء بالخطاب الإعلامي إلى مستوى تطلعات الراي العام التونسي. سادسا:اذا كانت الوكالة قد تعاملت مع الحملات اللاحقة باكثر مسؤولية وهو في ذاته مؤشر جيد فلماذا لا يتم الافراج عن المدونات المحجوبة؟؟ واخيرا دعوة لكل المدونين والاصدقاء ان يشاركوا في الدعوة الى رفع الحجب عن المدونة التونسية والمدونات المذكورة ان امنوا بهذه الرسالة واعتبر التصويت لهذا البوست اقرارا منهم بذلك .
أنا لا أقصد و لا أوجّه أية إهانة بحديثي عن الإعاقة الذهنيّة، بالعكس، أنا ألتمس العذر و أبحث عن تبرير لتصرّف تهينين به نفسك و تساهمين به في تخلّف مجتمعك و ضحك الأمم على أمّتك. و إلاّ ما الذي يدعوك إلى وضع تلك الخرقة المضحكة و المهينة في نفس الوقت على رأسك، و بكلّ أشكالها المتناقضة أحيانا ؟ صدّقت شيوخ الجهل و دعاة البزنس الجدد أنها أمر من الله إليك ؟ و أين عقلك إذا ؟ هل قرأت القرآن أم قرأه عنك شيخك ؟ و هل درست الحديث أم أقنعتك صديقتك أنّ الحجاب أمر شرعي صريح ؟
كيف تصدّقين لو لم تكوني معاقة ذهنيّا أنّك مجرّد شيئ، عورة يجب إخفائها و عار يجب إراقة الدم على جوانبه لو رفعت الريح طرف ثوبك ؟ ما الذي يجعلك تؤمنين و تصدّقين هذه الأحاديث التي رواها في اغلبها أبو هريرة، هذا الذي لا يعرف أصله كاملا و الذي لم يصاحب الرّسول إلاّ قليلا و مع ذلك هو يروي عنه أربعة عشر حديثا جديدا كلّ يوم، و هو الذي روى كلّ الأحاديث المحقّرة من شأن المرأة فجعلك مثل الكلب و الحمار و حاشاك البراز تنقضين الوضوء و الصّلاة، هل ترضين لنفسك تلك المنزلة أم تقولين ما قالته عائشة : سوّيتمونا بالكلاب و الحمير.
هل تعرفين أصلا أنّ كلمة حجاب هي الساتر الحاجب للشيئ و ليس قطعة القماش التي تلبسينها، أي أنك يجب أن لا تخرجي أصلا من بيتك و لا ترين أحدا ؟ هل هذه هي المرحلة القادمة ؟ عصر الحريم، هي نفس النصوص التي يسمّونها شرعيّة. قرن في بيوتكنّ. ذلك ما ينتظرك. و لا تصدّقيهم حين يقولون لك كرّم الإسلام المرأة، إسلامهم الذي صنعوه بالأحاديث الموضوعة لم يكرّمك بل يروي البخاري، في ما يسمّى صحيحه أنك لو دعاك زوجك و أبيت، مهما كان السبب أو حالتك، المهم أنه رغب هو، فإن الملائكة ستدعوا عليك حتّى تصبحين. هل تريدين المزيد ؟ حسنا، لو لم يكن السجود لغير الله حراما لأمرت أن تسجدي لزوجك. أرأيت التكريم ؟ أريت مذا تريدين بنفسك بعد قرن من النهضة و التنوير و تضحيات الروّاد من قاسم أمين للطّاهر الحدّاد مثلا لا حصرا.
ثمّ أن هذا الشكل من اللباس لا علاقة له لا بالتراث و لا بالإسلام و لكن بالثورة الإيرانيّة و جماعة إخو الخراب الأخوان المسلمين، و مشروعهم الظلامي للوصول للحكم. كانت النساء تتوضئ في مسجد الرسول مع الرجال جنبا لجنب حتى جزء من خلافة عمر. فكيف يكون الحجاب شرعا و يكون الإختلاط في الأسواق و الوضوء جنب الرجال أمام الرسول و أبو بكر و عمر شيئا عاديّا ؟
أليست الإعاقة الذهنيّة تفسيرا معقولا أو أفظل من أن تكوني بالحمق و الغباء الذي تتنازلين فيه عن إنسانيّتك لأجل رؤية جنسيّة مريضة لأناس مرضى.
إلاّ أن تكوني غير مقتنعة و لكن لبسته فقط خضوعا أو نفاقا. في حالة الخضوع و أنا أعلم الكمّ الهائل من الترغيب و الترهيب المموّل من أموال البترول، فشيوخ الخليج المتمتعين بثروات لم يحلموا بها أو يتعبوا و يشقوا لأجلها يكفّرون عن سيّئاتهمو زيجاتهم و نزواتهم اليوميّة ببناء الجوامع و نشر الفكر الوهّابي. إنّها علاقة تجارة مع الله. فكلّ عربيّ تاجر. لكن الله جلّ جلاله ليس تاجرا و لا تزر وازرة وزر أخرى. و في حالة النفاق، تكونين فقط تضعين علامة شكليّة لتقولين أنا محجبّة و تفعلين بعد ذلك ما تشائين، و هذا ما يحدث غاليا و ما كان يحدث طوال القرون الفائتة، كلّ شيئ في السر ، مخفي، و هنا أيضا أفظّل الإعاقة الذهنيّة على هذا التصرّف الخبيث.
في ثلاثينات و أربعينات القرن الماضي كان ثمّة أمة مايو في مصر، اليوم في هذا القرن ثمّة أزمة نقاب و حجاب. و أنت تشاركين في جعل هذه الأمة متخلّفة و منحطّة و تضحك من جهلها الأمم. حتّى الله لن يغفر لقوم يحطّون من شأنهم بأيديهم و جهلهم و تعطيلهم عقلهم حتّى ركبتهم كلّ امم الأرض.
أختي المحجّبة، كوني أنت، إنسانة و أخت حقيقيّة، لا عورة و متاع جنسي و أداة هدم في يد إخوان الخراب، إقري بنفسك و حكّمي عقلك، و لا تصدّقي من قال لك أن العقل و الفكر حرام، هو نعمة من الله، إحمديه عليها باستعمالها، و كان الله في عون الجميع
الرجولية؛ فلان راجل ياسر؛ او فلان ماهوشي راجل؛ لا او يقولوا زادا فلانة رجالة ما ثماش كيفها؛ او في العلاقات بين الراجل او الرجالة-مؤنث- باش تكون راجل لازمك تكون صيد كلمتك ما ترجعشي لتالي؛ لازم المرا ما تسمع منك كان كلمة اعمل؛ هات؛ امشي…الخ؛ معناها تسمع الاوامر او تسكر فمها؛ مالا باش راجل انت؛ هي الرجولية لعبة؛ لازمك تكون اشنب شناباتك واقفة؛ كان معندكش ركب شلاغم اصطناعية؛ خير ملي الرجولية متاعك تكون ناقصة؛ من علامات الرجولية ياسيدي انك لازمك تكون مغيار على مرتك؛ مالا كيفاش؛ لازمك ما تخلي حد يكلمها ولا يجي على حالها؛ اما كان كلمت هي واحد عاد؛ هوني عاد سامحني فيك؛ ماكشي راجل؛ اكبس تلقى ما تحل؛ مالازمها تكلم حتى راجل غيرك؛ لازمها تعرف اللي ثمة راجل واحد في الدنيا؛ هو لشنب بو…؛ اللي هو انت طبعا؛ حوايجها لازم يكونوا مخيطين عند الخياطة؛ موش نساء توة تلقاها لابسة مريول ولا ملابس داخلية فيهم اسم راجل آخر او زيد يهود ما همشي حتى مسلمين كيما لاكوست او بوقار او غيرهم ياسر؛ يا سيدي كانها عل الاسامي خوذ ستيلو او اكتبلها اسمك عل المريول او زيد صحح فيه باش يولي سينيه؛ ماهم يموتوا عل حوايج السينيه؛ القضية لازم تقضيها انت موش لمرا ؛على خاطر الخضارة كلهم رجال او هذا ما يليقش بيك؛ تصور مرتك توقف تحكي او تضحك مع الخضار او تقولو اعطيني كيلو فقوس ولا بانان؛ ملا حشمة؛ والله يولي حلال ذبحها؛ انا مثلا حتى كي نمشي للخضار الفقوس نقصو تروف قبل ما نروح بيه؛ او البنان هزو عصير؛ ملا تلعب انت؛ انا عندي صاحبي طلب مرتو في التلفون في الليل ردوا عليه قالولو مخاطبكم خارج الخدمة؛ روح قتلها؛ مالا شنهي ؛ ما عندناش نساء تخدم في اليل. هيا برجولية توة لازمني نمشي قناة اقرأ بالسوري قريب تحل. ما ذابي كان واحدة من الاوخيات المدونات يعملونا النسخة النسائية لهل الحكاية باش يوعيو النساء كيفاش تكون بنت عايلة. مشكورين مسبقا
نحب نحرق لطاليا؛ نحب نحرق الميزيريا او البغض؛ نحب نحرق روحي ؛ نحب نحرق الماضي او الحاضر؛ فديت ... رانا هردنا؛ ما عادش فيها؛ نحب نعيش غبّار خير ملي نعيش طول عمري نشم في الغبرة متاع الكراهب متاع "اسيادي " في الكياس اللي او مانيش عارف علاش مافيشي تروتوار للمزرمين اللي كيفي؛ نخاف نمشي في الكياس يعفسني سيدي؛ نحب نحرق نعيش مفيوزي او غبار؛ نحب نحرق الميتريز او الماجستير او الدكتوراه اللي ما يجبوش شمة في ميلانو؛ بلاد اللي فيها كل شي موجود؛ حتى لهني كل شيء موجود؛ كان انا او امثالي ماناش موجودين؛ ولا موجودين اما ما يحب حد يشوفنا؛ محروقين من نهار اللي تولدنا؛ بلادنا حرقتنا... آه على الحرقة... نحب نعيش خليقة او مفيوزي او ندخل الفلوس او نعيش كيما "الاسياد"؛؛ في بلاد المافيا تنجم تعيش مفيوزي او تحرق العالم؛ اما لهني في بلادنا ؛ ماهيشي بلاد المافيا؛ هذاكا علاش ما تنجمشي تحرق لهني؛ ما تنجم تحرق كان روحك لهني؛ عاد انت محروق محروق على الاقل عيش حارق خير ملي تعيش محروق؛ حارق في طاليا من غير اوراق؛ خير ملي تعيش خايف من الاوراق؛ ما ثماش تونسي ما يخافش من الاوراق؛ كان قالولك هات اوراقك؛ هات بطاقة تعريف؛ اعرف روحك راك باش تتحرق او مشيت تزمر؛ ما خيبهم الاوراق كي تولي ماكش حارق؛ او محلاهم الاوراق كي تولي حارق؛ اما ما اخيبشي من كي تولي انت بيدك محروق؛ هذاكا علاش ياولدي احرق خير ملي يحرقوك؛ طاليا محلاش لا منها راهو؛ او هذاكا علاش لعباد اللي ماهاش محروقة يا اما راهي حارقة ولا مطلينة في بلادنا يحكموا باحكامهم
عمي المولدي الله يرحمو او ينعمو جاتو بنية نهار الاستقلال متاع بلادنا العزيزة آخي سمّاها حرية؛ فرحتو بالبنية او زيد فرحتو بالاستقلال خلات انو ما ثمة حتى اسم للهل بنية احسن من اسم حرية؛ آش خير من الحرية؛ هيا فرحو بيها الدار الكل او جات الناس تهني من كل بلاصة؛ مبروك الحرية او تتربى في عزك يا سي المولدي؛ عمكم المولدي هذا كان مدب يقري في القرآن او تعب او شقى مسكين باش ربى اولادو او قراهم او وصلهم؛ اختنا حرية هذي جات مزيانة ياسر او يضرب بيها المثل في الزين؛ ما ثماش اختها في البلاد؛ كبرت البنية اونجحت في قرايتها او ولات دكتورة متاع عظام؛ معناها بالعربي مختصة في ضحايا التقديق او عفسان الكرايم او هات من هاك اللاوي؛ هيا توة البنية ولات مرا او وجاء وقت ولى لازمها راجل يسترها او يحميها؛ تقدملها الطبيب او المحامي او المهندس اما شيء ؛ عمك المولدي ما رضاش؛ قال انا عندي بنية واحدة او زيد زينها ما جابلها كان الحساد؛ لازم نعطيها لراجل صيد يحميها او يعرف قيمتها؛ موش راجل من جماعة الستيلو و الورقة اللي ما فالحين كان في العياط او الزياط في الشارع قال شنهي ثقفود او موش عاجبهم الوضع الراهن؛ اما هو كان موافقهم في حاجة بركة اللي الوضع راهن ياسر او هذاكا توة عصر صيودة موش جماعة البشكوطو هاذم؛ او اختكم حرية مسكينة رغم الثقافة او الزين متاعها مسكينة ما تنجمشي تحل فمها قدام سي المدب؛ عيب ما يجيش؛ البابا هو الكل في الكل او قيما يقولو ما رضاء الله الا برضاء البابا؛ حرية هذي المسكينة متبلغمة او ما تنجم تعارض كلام بوها كان في راسها ولا كي تولي مع امها في الكوجينة؛ الحديث متاع الكوجينة يقعد في الكوجينة حدو غادي؛ او امها مسكينة هذاكا حدها تصبر فيها او تقوللها هذا المكتوب بنيتي؛ كان كاتبتلك حاجة تو تجيك؛ آش باش تعمل؟ باش تجي ضد بوك؟؟ اصبر او هذاكا هو؛ او هاك حرية تغلي مسكينة من داخل اما فمها ديما مسكر تستنى في فرج ربي؛ هيا كبرت الطفلة او ولات باش تبور او سي المدب باقي شاد الصحيح؛ نقصت الخطاب لن ولا ما عاد جاي حد او حرية باش تراصيلها من غير راجل المسكينة؛ هاك الزين او العين كلو باش يمشي خسارة؛ هيا بعد مدة ثمة شايب عريف في الجيش العزوزة متاعو ماتت؛ قال شفولي مرا تخدمني؛ احب ايجدد شبابو؛ هيا جاو يخطبو في حرية؛ سي المدب قال ابدا؛ نعطي حرية او ماندراك لشايب؟؟ هيا لزتو امها او قالتلو ياولدي حرية راهي بارت او كبرت ماعاد باش يخطبها حد باهي؛ يا حسرة على حرية متاع قبل؛ هيا بعد هزان او نفضان ولا او قبل؛ او اختكم حرية مسكينة ديما مسكرة فمها او متبّصة راسها ما تقولش لا؛ هيا هزوها للشايب لا زفة لا زمارة؛ العريف هذا كي شاف اللي المرا مزيانة ياسر؛ ولا او سكّر عليها الدار لا خرجة لا دخلة؛ حتى ضوء الشمس ما تشوفوش؛ ايجيها من الليل لليل يقضي حاجتو منها او يرقد؛ او هي المسكينة ديما مسكرة فمها او راضية؛ هيا مسكينة ماهي تعدي النهار الكل وحدها او ما تكلم في حد قالت هيا نجرب نغني شوية على الاقل نعمل حاجة؛ هيا ولات حرية تغني او اكتشفت وقتها لاول مرة اللي هي عندها صوت هايل ياسر؛ صوت حلو عذب ما ثماش كيفو؛ عمرها كامل مسكينة ساكنة ماجاش في بالها اللي صوتها روعة هكة؛ هيا عجتها لحكاية او ولات النهار الكل تغني بين هاك الاربعة حيوط حتى لين ولا صوتها عامل حالة في الجيران او الناس الكل تحكي بصوت حرية الملائكي اللي ما ثماش كيفو؛ في لول ولات النساء تجيها للدار باش يسمعوها؛ او بعد ولاو ايجيبو معاهم اولادهم او ولات الدار تعبي او تفرغ بالنساء ولي تجي تخلي حويجة؛ شوية فلوس ترف قماش؛ هاك الشايب لقاها لحكاية فيها رزق او الناس الكل لازتو تحب تدخل ماعادش منجم يقول لا؛ او اختكم حرية خذات ثيقة في روحها او ولات تحكم باحكامها في الدار حتى ولات الدار صغيرة عليها او على جمهورها ولات خرجت البرا او بدات تغني في المسرح او قدام جمهور كبير؛ الشايب ما عجباتوش لحكاية حب ايرجعها لاربعة حيوط متاع قبل؛ اما وينك توة؛ البيعة تبدلت؛ توة حرية صوتها واصل لكل بلاصة وجمهورها ماعادش اينجم بلا بيها؛ هيا طلقت هاك الراجل او خذات فنان كيفها وقعد صوتها مالي لبلاد؛ او هذاكا علاش ايقولو توة صوت الحرية محلاش لا منو.
كرمت جمعية ادبية عريقة ذات مرة الاستاذ الناقد توفيق بكار وصادف ان كان تكريمه متساوقا مع تكريم حمادي العقربي فلاحظ الاستاذ شح الحضور للملتقى فأسر لاحد المنظمين الذي اراد ان يتذارك الموقف فخاطب الاستاذ الضيف مستسمحا العذر واعلن في المصدح ان شح الحضور يعود لتزامن تكريم الاستاذ بكار مع تكريم ساحر الجيلين حمادي العقربي .فرد الاستاذ بكار ببديهته المعهودة وعمق فطانته النقدية قائلا :" لا استغرب هذا من شعب يفكر بنصفه الاسفل اكثر مما يفكر بنصفه الاعلى " ذكرتني هذه الحاثة بحال لا فقط التونسيون بل العرب ككل الذين تخلو عن قضاياهم الرئيسية لينشغلوا بقضايا ثانوية عاذ ما تلتصق فعلا كما قال الاستاذ بكار بنصفنا البيولوجي الاسفل الذي لم يبق لنا منه الا " متنفس" كما قال توفيق الجبالي في مسرحية "كلام الليل". لكن مثل هذا الكلام او النقد يكون اكثر مرارة حين تجد مبدعا مثل محمد الماغوط يتسائل : " أمة بكاملها تحل الكلمات المتقاطعة وتتابع المباريات الرياضية، أو تمثيلية السهرة ، والبنادق الاسرائيلية مصوبة إلى جبينها وارضها وكرامتها وبترولها. كيف اوقظها من سباتها، وأقنعها بأن أحلام اسرائيل اطول من حدودها بكثير، وان ظهورها أمام الرأي العام العالمي بهذا المظهر الفاتيكاني المسالم لا يعني أن جنوب لبنان هو نهاية المطاف؟"
